О Пресвятая Госпоже Дево Богородице, Высшая чинов ангельских и Святейшая всех святых !

Тебе Преблагословенней, на горе Тервеничестей икону благоизволившей явити, яко залог видимый невидимаго пребывания Твоего на месте сем, припадающе молимся.

Обители и северному краю нашему буди покров и заступление. Всех же притекающих с верою к цельбоносней воде на месте явления Твоего буди Благая целительница, утешение и спасение коемуждо устрояющи.

Яви воду сию силою Божиею свыше быти пиющим от нея, мажущимся и кропящимся ею рабом Твоим в пременение страстей, во оставление грехов, во исцеление болезней и во отгнание всякого зла, во освящение же и благословение домов и очищение всякого места от скверны.

Сотвори предстательством Твоим и заступлением у Сына Твоего Христа Бога нашего да никтоже отъидет от места сего тощь упования своего и посрамлен в надежде своей, но да приимет кийждо от Тебе вся по благому прошению сердца своего, по нужде и потребе своей, во спасение души и во здравие телу.

Да всегда величая благодеяния Твоя явленные и являемые на месте сем, прославим Великаго Благподателя Бога и Твое Матернее к Нему заступление, всегда ныне и присно и во веки веков. Аминь.