Призри с высоты небеснаго величия Твоего на нас молящихся и припадающих ко святей иконе Твоей, юже благоизволила еси явити на горе Тервеничестей. Лобызая ю благоговейно яко саму Тя с нами сущую, молимся усердно. Не гнушайся нас грешных на Твою милость уповающих. Умилосердися к нам и яви всемощный покров Твой и заступление. Отжени всяку мглу сердец наших. Даруй нам покаяние и сокрушение сердечное. Помози нам отеческую православную веру до конца дней наших непорочно сохранити и во всех заповедех Господних неуклонно ходити.

О, Премилостивая Госпоже Богомати, не преставай молитися Рождшемуся от Тебе Христу Богу нашему за всех притекающих с верою к чудотворному образу Твоему. Подавай скорую помощь и утешение в скорбех и напастех, избавляй от клеветы и злобы человеческия, от враг видимых и невидимых, от нужды и печали. Не преставай покрывати покровом милости иночествующих обители Твоея, сотвори милостива им быти Благаго и Человеколюбиваго Бога, отврати всякий гнев Его на них движимый и избави обитель от належащего и праведнаго прещения.

О, Пресвятая Владычице, небесных чинов украшение, мучеников слава и всех святых радосте, с ними моли Господа Вседержителя, да сподобит нас в покаянии и благочестии скончати время земнаго жития. В час же смертный избави нас от власти сил бесовских и осуждения на вечныя муки, да сподобившеся предел горняго царствия Божия, возвеличим Тя заступницу нашу, прославляя воплощшагося от Тебе Христа Бога нашего, Емуже слава со Отцем и Святым Духом ныне и присно и во веки веков. Аминь.